Link açıqlığı

Qırımda jurnalistlerni deputatlarğa tahallüs ve kendi aqqında bütün malümatnı aydınlatmağa mecbur eteler


Qırım «Devlet şurasında» akkreditatsiyanı almaq içün kütleviy haber vastalarınıñ hadimleri kendi icadiy tahallüslerini aydınlatmaq kerekler.

Krımmedia neşiriniñ yazğanına köre, işbu madde Qırım Cumhuriyeti Devlet şurasınıñ malümat siyaseti boyunca komitet toplaşuvında leyhası baqılğan «Qırım Cumhuriyetiniñ Devlet şurası yanında jurnalistler, matbuat vastaları, malümat agentlikleriniñ hadimlerine akkreditatsiya berüv nizamnamesinde» mevcut.

Bundan ğayrı, akkreditatsiya arizasında bulunğan vazife, tasil ve tecribe, zenaat, iş telefonı ve cep telefonı, jurnalistniñ elektron poçta adresini qayd etmeli.

Komitet yolbaşçısı Sergey Şuvaynikovnınh bildirgenine köre, akkreditatsiya aqqında nizamname leyhası kütleviy haber vastalarınıñ hadimleri tarafından muzakere etilecek ve Devlet şurası saytında derc etilecek.

Onıñ aytqanına köre, vesiqa Qırım Muhtar Cumhuriyetiniñ Yuqarı Şurasında akkreditatsiya aqqında nizamnamesine esaslandı ve Rusiye maddelerine köre tüzetildi.

Şuvaynikovnıñ aytqanına köre, deputat onıñ aqqında tarqatılğan yañlış malümatnı re ete bile. Bunıñ kibi malümat diskreditatsiya maqsadında tarqatılsa, bunı mahkeme baqacaqtır.

Bu sebepten o kütleviy haber vastalarınıñ hadimlerine Rusiye qanunlarını diqqatnen ögrenmege tevsiye etti.

XS
SM
MD
LG