Qırımnıñ yerli «akimiyeti» ile dialog onıñ tanılmasını ifadeley ve Ukraina qanunları seviyesinde yasaq etilmek kerek.
Böyle bir fikirni İstanbuldaki Ukrainanıñ sabıq baş konsulı , «Maydan inostrannıh del» fondunıñ yolbaşçısı Bogdan Yaremenko Qırım.Aqiqat saytına seslendirdi.
Onıñ fikirince, dialognıñ yekâne şekli yarımada işğaline qol tutqan insanlarğa qarşı cinaiy işler olması mümkün.
«İşğalcilerniñ tarafdarları ile işniñ yekâne şekli – istilâcı ve işğalci tarafını alğan Ukrainanıñ sabıq hızmetçileri ve arbiylerine qarşı cinaiy işlerdir. Söz sırası, Ukraina Rusiyeden örnek alıp, Qırım işğalini red etüv, Ukrainağa qarşı istilâğa qol tutuv, em de işğalge yardım içün cinaiy mesülietni kirsetmek kerek edi», – dep tüşüne Yaremenko.
2014 senesi mart 16-da Qırım ve Aqyar şeerinde yarımada statusı aqqında «referendum» olıp keçti. Onıñ neticesinde Rusiye Qırımnı öz terkibine qabul etti. Ne Ukraina, ne Avropa Birligi, ne de Amerika Qoşma Ştatları işbu rey berüvni tanımadılar.
