Qırım «yolbaşçısı» Sergey Aksönov Qırımtatar Milliy Meclisi ile laf etmeycek. O, onıñ resmiy qayd etilmesini bekleycek eken.
Bu aqqında o Moskvada matbuat konferentsiyasında jurnalistlerge bildirdi.
Aynı vaqıtta Aksönov Meclisni onıñ Aqmescitteki binasından çıqarılmasını red ete.
«Meclislerni bir kimse bir yerden çıqarmadı. Yalıñız Bağçasaray regional meclisini çıqardılar. Bu şahsiy binadır, adamğa ait. Andan birisini quvmaq imkânsızdır. Mında ise «Qırım» fondu aqqında laf oldı, onıñ tesisçisi diger devletniñ vatandaşı ola, onıñ içün onı mahkeme qararına köre yoq etmek ihtiyacı bar edi», – dedi o.
Sentâbr 16-da, Qırımtatar Milliy Meclisiniñ binasında 12 saatlıq tintüv keçirildi. Neticede vesiqa, protokol, USB-fleş-taşıyıcıları, kassetler, İslâm edebiyatı ve bilgisayarlarnı alıp kettiler.
Bundan soñra, sentâbr 17-de, Meclis binasında «Qırım» Fondu» Hayriye Teşkilâtınıñ reisi Riza Şevkiyevge mahkeme qararını seslendirdiler. Bundan soñ «Qırım» Fonduna» ait olğan binanı qapatmaq qararları aqqında bildirdiler. Bundan sebep Qırımtatar Milliy Meclisiniñ vekilleri binanı terk etmege mecbur ediler.
Sentâbr 19-da Qırımtatar Milliy Meclisiniñ temsilcileri binanı terk etip, onı müürlemege mecbur oldılar.
Mahkeme nezaretçileri Meclis, «Qırım» Fondu», «Avdet» gazetası, «Yıldız» mecmuası yerleşken Şmidta, 2 adresi boyunca binanı tevqif ettiler. Bundan ğayrı, közeticileriniñ vesiqalarında Meclis ofisleri, em de «Qırım» Fonduna» ait olğan biger obyektler yerleşken Jidkova, 40 adresi boyunca bina da qayd etile.
