Qırımnıñ öz başına ilân etilgen baş naziri Sergey Aksönovnıñ bildirgenine köre, yarımadada qırımtatarlarnı esir almaylar. Onıñ aytqanına köre, gayıp olğan oğlanlardan biri Suriyede elâk oldı.
Bu aqqında o Rossiyskaya gazeta neşirine bildirdi.
O, Qırımda insanlarnıñ ğayıp oluvı aqqında aytqan Rusiye prezidenti yanında insan aqları boyunca Şura azası ve jurnalist Nikolay Svanidzeni Qırımğa davet etip, onıñ malümatına köre, Suriyede cenkleşken oğlanlarnıñ ana-babalarınen körüşüvni teşkil etmege azır.
«Baş nazirniñ» zanınca, «akimiyet musulmanlar raat yaşaması içün elinden kelgenini yapa».
Oktâbr 14-te Rusiye yazıcısı Nikolay Svanidze İnsan aqları boyunca Şura toplaşuvında Rusiye prezidenti Vladimir Putinge Qırımda insanlar ğayıp olğanı aqqında bildirdi.
Pütin bundan haberi olmağanını bildirip, vaziyetni ögrenecek, dep işandırdı.
Oktâbr 14-te Qırım «Nazirler şurasında» ğayıp olğan insanlarnı qıdıruv boyunca kontakt gruppa azalarınıñ birinci körüşüvi olıp keçti. Tedbirde üç cinaiy iş açılması aqqında bildirdiler. Olardan ekisi – RF CK 105-inci maddesi boyunca mayıs ayında ğayıp olğan Timur Şaymardanov ve Seyran Zinedinovnen bağlı ve RF CK 126-ncı maddesi boyunca sentâbr ayınıñ soñunda ğayıp olğan İslâm Cepparov ve Cevdet İslâmovnen bağlı.
Hatırlatamız, sentâbr 27-de, saat 19.00 Qarasuvbazar civarında Sarı-Su qasabasında belgisiz şahıslar eki genç qırımtatarını esir alıp, belgisiz bir yönelişke alıp kettiler.
Oktâbr 1-de Qırım «yolbaşçısı» Sergey Aksönov ğayıp olğan gençlerniñ ana-babalarınen körüşip, ğayıp olğanlarnı tapmaq içün kontakt gruppası meydanğa ketirilecek, dep bildirgen edi.
