Kiyevde salı künü, oktâbr 14-te, Yuqarı Rada binası yanında çatışmalarda iştirak etip yaqalanğan insanlardan on kişi apske alındı.
Bu aqqında Ukraina kütleviy haber vastaları içki işler nazir mesleatçısı Zoran Şkirâkniñ bildirgenine köre haber eteler, – dep bildire Azatlıq Radiosı.
Onıñ aytqanına köre, «yaramazlıq» maddesi boyunca cinaiy iş açıldı. Yaqalanğan daa 17 insanğa nisbeten memuriy protokol tizildi. Olarnı yiberdiler.
Şkirâkniñ malümatına köre, çatışma iştirakçileri ve teşkilâtçılarınıñ şahısları ögrenildi.
Salı künü, oktâbr 14-te, «Svoboda» birleşmesiniñ aktsiyası devamında Yuqarı Rada yanında militsiya ile çatışmalar yüz berdi. Toplaşqanlar UPAnı Ekinci cian cenkinde cenkleşken taraf olaraq tanılmasını talap ettiler. Soñra «Pravıy sektor» bayraqlarınen adamlar Rada yanına yaqınlaştılar. Olar binağa Molotov qarışmasını attılar.
«Pravıy sektor» ve «Svoboda» çatışmalarğa alâqaları olmağanını bildireler.
