2014 senesi dekabr 5-te Kiyevde mecburen köçip kelgen insanlarnıñ ekinci Bütünukrain forumı ötkerilecek.
Bu aqqında Qırım diasporası teşkilâtı bildire.
Memleket içinde köçip kelgen insanlarnıñ problemlerinen oğraşqan cemaaat teşkilâtları ve teşebbüsçilerni teşkiliy komitetke oktâbr 16-na qadar davet eteler.
Mecburen köçip kelgen insanlarnıñ birinci Bütünukrain forumı bu sene mayıs ayında Kiyevde olıp keçti. Lâkin tedbirde yalıñız işğal etilgen Qırım sakinleri iştirak ettiler.
Tedbirde vaqtınca ve daimiy mesken, qanunlar, teşebbüsler, içtimaiy teminlev, tasil, faaliyet ve bank faaliyeti kibi mevzular muzakere etildi.
Oktâbr 15-ne qadar Qırım Muhtar Cumhuriyeti ve Aqyar şeerinden Ukrainanıñ diger regionlarına köçip kelgen insanlarnıñ sayısı 18 biñ 740 insannı teşkil etti.
2014 senesi mart 16-da Qırım ve Aqyar şeerinde yarımada statusı aqqında «referendum» olıp keçti. Onıñ neticesinde Rusiye Qırımnı kendi terkibine qabul etti. Ne Ukraina, ne Avropa birligi, ne Amerika Qoşma Ştatları işbu rey berüvni tanımadılar.
