Oktâbr 14-te Qırım «Nazirler şurasında» Qırım «baş naziri» Sergey Aksönov ve Qırım boyunca Rusiye Taqiqat komitetiniñ birinci bölük reberi – müim işler taqiqatı boyunca idare reberiniñ muavini, adalet polkovnigi Bogdan Frantsişko yolbaşçılığında ğayıp olğan insanlarnı qıdıruv boyunca kontakt gruppa azalarınıñ birinci körüşüvi olıp keçti.
Bu aqqında kontakt gruppasınıñ koordinatorı Mammet Mambetov Qırım.Aqiqat saytına bildirdi.
Onıñ malümatına köre, körüşüvde zarar körgenlerniñ temsilcileri olaraq Abdureşit Cepparov ve Elvira Zinedinova, Emil Kürbedinov, Edem Semedlâyev ve Nariman Asanov iştirak ettiler.
Bogdan Frantsişko kontakt gruppasınıñ azalarına cinaiy işler açılması aqqında ayttı. Olardan ekisi – RF CK 105-inci maddesi boyunca mayıs ayında ğayıp olğan Timur Şaymardanov ve Seyran Zinedinovnen bağlı ve RF CK 126-ncı maddesi boyunca sentâbr ayınıñ soñunda ğayıp olğan İslâm Cepparov ve Cevdet İslâmovnen bağlı.
Onıñ qayd etkenine köre, kontakt gruppasınıñ azalarını taqiqat idaresi ögrengen cinaiy işler cedvelinde oktâbr 3-te ğayıp olğan Eskender Apselâmovnıñ işi olmağanı qasevetlendirdi.
Taqiqat komitetiniñ vekili bildirdi ki, Aqmescitniñ Merkeziy rayon politsiya bölügi ile bağlanıp, Apselâmovnıñ işini Qırım Taqiqat komitetiniñ Baş taqiqat komiteti içün isteycek.
Gruppanıñ Qırım reberligi ve Taqiqat Komiteti reberligi ile körüşüvlerini er aynıñ soñki salı künü keçirege teklif etildi.
Hatırlatamız, sentâbr 27-de, saat 19.00 Qarasuvbazar civarında Sarı-Su qasabasında belgisiz şahıslar eki genç qırımtatarını esir alıp, belgisiz bir yönelişke alıp kettiler.
Oktâbr 1-de Qırım «yolbaşçısı» Sergey Aksönov ğayıp olğan gençlerniñ ana-babalarınen körüşip, ğayıp olğanlarnı tapmaq içün kontakt gruppası meydanğa ketirilecek, dep bildirgen edi.
