Ukraina prezidenti Rusiye Federatsiyası Prezidenti Vladimir Putin ile telefon vastasınen subetleşti. Bu aqqında devlet yolbaşçısınıñ matbuat hızmeti bildire.
Petro Poroşenko ve Vladimir Putin ateş toqtatılması ve ordular çekilmesi aqqında añlaşmalarğa riayet etmek kerekligini qayd ettiler.
Olar oktâbr 16-17 künleri Milanda ötkerilecek ACEM sammitiniñ formatı ve kün tertibini muzakere ettiler.
Malüm ki, Rusiye devlet yolbaşçısınıñ yardımcısı Yuriy Uşakov bildirdi ki, Rusiye ve Ukraina prezidentleri – Vladimir Putin ve Petro Poroşenkonıñ – körüşüvi Milanda ACEM sammiti devamında keçirile bile.
Onıñ aytqanına köre, Rusiye prezidenti diger ğarp liderleri, sammit iştirakçileri, şu cümleden Almaniya kantsleri Angela Merkel ve Frenkistan prezidenti Fransua Olland ile laf etecek. Uşakov dey ki, körüşüvlerniñ esas mevzusı Ukrainadaki vaziyet olacaq. Onıñ aytqanına köre, Büyük Britaniya baş naziri, İtaliya baş naziri ve Avropa komissiyası reberliginiñ körüşüvleri keçirilmesi mümkün.
ACEM sammiti (Asia–Europe Meeting) – Şarqiy Asiya ve Avropanıñ 51 memleketni birleştirgen halqara teşkilâtnıñ sammiti oktâbr 16-17 künleri Milanda (İtaliya) keçirilecek.
