İşğal etilgen Qırımda yerli akimiyet musulmanlarğa Rusiyede yasaq etilgen edebiyatnı yoq etmege tevsiye ete, – dep bildirdi Qırımnıñ öz başına ilân etilgen baş naziri Sergey Aksönov.
Qırımnıñ öz başına ilân etilgen baş naziri qayd etti ki, kelecek üç ay devamında musulmanlarğa er şeyni añlatajaqlar, kütleviy haber vastalarında ise Qırımnıñ qanunğa riayet etken sakinleri yoq etecek edebiyat cedveli aydınlatılacaq.
«Bizler müftiyatnen işbirlik tutamız ve bunıñ kibi edebiyat olğan musulmanlarnı onı müftiyatqa ketirmege rica etemiz», – dep bildirdi o.
Qırım «yolbaşçısı» Sergey Aksönov bildirdi ki, Qırımda keçici müddet devamında yasaq etilgen edebiyatnı tutıp almaq yasaqtır.
Avgust ayında Qırım Müftiyatı Rusiyede yasaq etilgen musulman edebiyatınıñ cedvelini tizgen edi.
Malüm olğanı kibi, qırımtatar aileleri, cami ve medreselerde keçirilgen bir sıra tintüvlerniñ resmiy sebebi aynı yasaq etilgen edebiyat oldı.
