Salı künü, oktâbr 14-te, Ukraina Yuqarı Radasınıñ binası yanında çatışmalar yüz berdi. Azatlıq Radiosınıñ mühbiri bildire ki, betlerini saqlağan belgisiz şahıslar binanı qoruğan uquq qoruyıcılarğa yanıcı qarışma, taş attılar. Militsiya gaznı qullandı.
Azatlıq Radiosınıñ «Shemı» yayınınıñ jurnalisti Sergey Andruşkonıñ aytqanına köre, parlamentniñ pencerelerine ateş açıldı, bina içindeki imayeni quvetleştireler.
İçki işler naziriniñ mesleatçısı Şkirâk neşirge bergen malümatına köre, böyle etip parlament yanında toplaşqan insanlar Kremlniñ aytqanlarını yapalar ve Yuqarı Radağa qanunlarnı qabul etmege imkân bermeyler.
Mühbirniñ malümatına köre, parlament yanındaki faaller «Svoboda», «Pravıy sektor» bayraqlarınen keldiler.
Gromadske TV bildirgenine köre, «Svoboda» azaları tarafdarlarını çetke çektiler.
Saba Yuqarı Rada yanında VO «Svoboda» teşkil etken miting olıp keçti. Onıñ iştirakçileri UPAnı tanımağa ve kommunistik mefküresini yasaq etmege talap ettiler.
Parlament ise OUN-UPAnı Ekinci cian cenkinde cenkçi taraf olaraq tanımadı.
