Oktâbr 14-te işğal etilgen Aqmescitte Sevastopolskaya soqağı rayonında ğayıp olğan eki studentlerden biri – Belâl Belâlovnıñ – cesedi tapıldı. Bunı Qırımnıñ öz başına ilân etilgen ükümetine yaqın olğan Krıminform saytı bildire.
«İlk malümatlarğa köre, genç tütün qarışması ile («spays») zeerlendi. Ekinci student, Artöm Dayrabekovnı, ekimler qorçaladılar», – dep yaza neşir.
Qırım.Aqiqat Artömniñ soy-soplarından haberni ögrenecek oldı, lâkin onıñ ğayıp olmasını bildirgen tizesi izaatlardan vazgeçti.
Qırımnıñ MVD bölüginde de işbu vaqianı tefsir etmeyler.
Aynı vaqıtta Artöm «Vkontakte» içtimaiy ağındaki saifesinde er şey yerinde olğanını yaza.
Bazarertesi künü, oktâbr 13-te, Qırımda eki genç ğayıp olğanını bildirdiler. Vernadskiy adına Tavriya milliy universitetiniñ birinci kurs talebesi Artöm Dayrabekov, ve onıñ dostu Belâl Bilâlov, Qırım müendislik pedagogika universitetiniñ birinci kurs talebesi, ğayıp oldılar.
Gençlerniñ aqrabaları politsiyağa muracaat ettiler.
Sentâbr 27-de Qarasuvbazar civarındaki Sarı-Su köyünde belgisiz şahıslar eki genç İslâm Cepparov ve Cevdet İslâmovnı esir aldılar. Olarnı alâ daa tapmadılar.
Sentâbr 29-da Kezlevde qırımtatarı Edem Asanov ğayıp oldı. Oktâbr 6-da onı ölü taptılar. Qırımtatar Milliy Meclisi Qırım.Aqiqatqa bergen malümatqa köre, oğlan asılğan alda tapıldı.
Birleşken Milletler Teşkilâtınıñ Ukrainada insan aq-uquqlarına riayet etüv aqqında soñki maruzasında Qırımdaki vaziyet, şu cümleden qırımtatar halqı vekillerine nisbeten basqı qayd etile.
BMT İnsan aqları boyunca idare Qırım akimiyeti ve Rusiye akimiyetine qırımtatarlarğa qarşı basqı, qorquzuv areketlerini toqtatmağa ve yarımadanıñ er bir sakinine esas aqlarını kefil etmege çağıra.
