2014 senesi, oktâbr 14-18 künleri, Aqmescitte Özbek han camisiniñ 700 yıllığına bağışlanğan «Qırımnıñ islâmiy mirasını ögrenüv ve saqlav boyunca aktual meseleler» serlevalı Halqara ilmiy-ameliy konferentsiya keçirilecek, dep haber ete Qırım musulmanları Diniy idaresiniñ matbuat hızmeti.
Berilgen malümatqa köre, oktâbr 14-te konferentsiya iştirakçileriniñ kelüv künüdir. Oktâbr 15 umumiy toplaşuvnıñ birinci künüdir. Umumiy toplaşuv Aqmescit şeeri, Uçebnıy tar soqağı, 8 adresi boyunca yerleşken Qırım müendislik-pedagogika universitetiniñ salonında keçirilecek.
İştirakçilerniñ qayd etilmesi saat 10.00-da başlanacaq. Konferentsiya açılışı saat 12.00-de qararlaştırılğan. İlk künü «Eski Qırım» filmi, «Qırım camileri» fotosergisi taqdim etilecek, umumiy toplaşuv keçirilecek, Eski Qırım şeerindeki Özbek han camisi ve İncibek Hatun medresesi ziyaret etilecek.
Oktâbr 16-da, umumiy toplaşuv çerçivesinde, Moskva musafirhanesiniñ konferents-salonında (Aqmescit ş., Kiyevskaya soqağı, 2) «Altın Orda Qırım Ulusınıñ islâmiy tarihı», «Altın Orda deviri Qırım musulman mimarcılığı», «Altın Orda deviri Qırım tarihiy-medeniy mirasınıñ saqlanması boyunca aktual meseleler» bölükleri çalışacaq.
Toplaşuvda Aqmescit, Qazan, Sankt-Peterburg, Moskva, Trabzon, Anqara, Könya, Taşkent ve diger Türkiye, Özbekistan ve Gollandiya memleketleriniñ diger şeerlerinden kelgen alimler, dinşınaslar iştirak etecekler.
Oktâbr 17-de Bağçasaray şeerine ziyaret teşkil etilecek. Oktâbr 18-de konferentsiya iştirakçileri ve musafirleri evlerine qaytacaqlar.
