Salı künü, oktâbr 14-te, Ukraina Yuqarı Radasınıñ kirişi yanında «Memleket içinde köçip kelgen insanlarnıñ aqları ve serbestligini teminlev aqqında» qanun leyhasınıñ qabul etilmesi içün Qırım ve Donbasstan köçip kelgen insanlarnıñ iştiragi ile piket ötkerildi. Aktsiya iştirakçileri parlament binası yanında üç saat turdılar, lâkin deputatlardan iç kimse olarnıñ yanına kelmedi.
Bunı aktsiya iştirakçileri Qırım.Aqiqat mühbirine bildirdiler.
Olarnıñ malümatına köre, UDAR fraktsiyasınıñ azası Sergey Künitsın olarnıñ petitsiyasını alıp, sessiya zalında seslendirecegini vade etken edi. Lâkin halq deputatı miting iştirakçileriniñ yanına öyle de kelmedi.
«Memleket içinde köçip kelgen insanlarnıñ aqları ve serbestligini teminlev aqqında» qanun leyhasınıñ qabul etilmesi içün birinci aktsiya oktâbr 7-de olıp keçti. Lâkin qanun leyhası kün tertibine kirsetilmedi.
Yuqarı Rada oktâbr 14-te «Memleket içinde köçip kelgen insanlarnıñ aqları ve serbestligini teminlev aqqında» qanun leyhasını qabul etmesi, gumanitar felâket qopması mümkün, dep bildireler cemaatçılar.
Ukrain ombudsmeni Valeriya Lutkovskaya ve prezident Petro Poroşenko vesiqanı acele sürette qabul etmege çağıralar.
№ 4490-1 qanun leyhası halqara teşkilâtlar ve uquq qorçalayıcılar ile beraber azırlandı. Sentâbr 16-da onı kün tertibine kirsettiler, lâkin öyle de muzakere etmediler.
Qanun leyhası köçip kelgen insanlarnıñ esas problemlerini çezmege yardım etecek.
