Link açıqlığı

Qırımda Vernadskiy adına Tavriya milliy universitetniñ birinci kurs talebesi Artöm Dayrabekov ğayıp oldı, bir sutkadan ziyade soyları onınen bağlanıp olamaylar. Bunı Qırım.Aqiqat saytına oğlannıñ tizesi Lilâ Belâlova haber etti.

Onıñ malümatına köre, bazar ertesi künü Artöm kündüz evden çıqıp, Aqmescitke universitetke baracaq edi. Yol boyu küçük qardaşını avtovokzal civarındaki 41sanlı mektepte qaldırdı.

«Onı saat altıda alıp qaytmaq kerek edi, onen soñki telefon bağı saat eki buçuqlarda edi. Er şey yahşı olğanı ve dostlarnen beraber bulunğanını ayttı. Er vaqıt olğanı kibi laf ettik. Amma, saat 18.00 de qardaşını mektepten almadı, biz qasevet etip başladıq. Çünki o pek mesülietli oğlan, balanı alıp olamasa edi, mıtlaqa haber eter edi», – dey qadın.

Tuvğanları mektepke aqşam saat yedilerge yaqın bardılar, anda qızçıq bir özü tura edi.

«Biz bir şey oldı dep añladıq. Telefonı ale daa qapalı. Tünevinden başlap telefon açıp olamaymız, dostlarınen internet vastası ile bağlanamız, amma, şimdilik onıñ ne yerde olğanı aqqında malümat yoq. Artömniñ anası şimdi tek ilâc içip otura, laf etmege bile çaresi yoq», – dey Lilâ Belâlova.

Qadınnıñ malümatına köre, tuvğanları endi politsiyağa muracaat ettiler, ğayıp olğan oğlannıñ dostları Qırım.Aqiqatqa bildirgenleri kibi, toqtamay hastahanelerge telefon açalar, amma, neticesiz.

Артем Дайрабеков
Артем Дайрабеков

Daa bir ğayıp olğan bala – Belâl Bilâlov, Qırım müendislik pedagogika universitetiniñ birinci kurs talebesi. Artömniñ soyları aytqanı kibi, olar dost ediler. Belâl Bilâlovnıñ soylarınen bağlanıp olamadıq.

Белял Белялов
Белял Белялов

Tuvğanlar yaşlarnıñ ğayıp oluvı sebeplerini atta tüşünmege qorqalar.

Sentâbr 27 künü Qarasuvbazar rayonı Sarı-Su köyünde eki yiigit İslâm Cepparov ve Cevdet İslâmov ğayıp oldılar. Olarnı ale daa tapmadılar.

Sentâbr 29 künü Kezlevde Edem Asanov yoq olıp ketti. Oktâbr 6 künü onı asılı taptılar.

BMT-nıñ Ukrainanen bağlı soñki maruzasında qayd etilgeni kibi, Qırımda insan aqlarınen bağlı vaziyet ep kerginleşe, qırımtatar halqına qarşı hususiy basqı yapıla, dep bildirile.

BMT-nıñ insan aqları boyunca idare Qırım akimiyeti ve Rusiye akimiyetine qırımtatarlarnıñ qorquzuvlarnı toqtatmağa tevsiye etti.

XS
SM
MD
LG