İşğal etilgen Aqyarda yerli «politsiya» türk askerleriniñ hatırasına tiklenilgen Abideni aramlav aqqında malümatnı teşkerecek, – dep haber ete Qırımnıñ öz başına ilân etilgen ükümet ruporı Krıminform saytı Aqyardaki RF MVD idaresiniñ matbuat hızmetine esaslanıp.
«Aqyarda RF MVD Balıqlava raynon idaresi Aqyarda Qırım cenkinde elâk olğan türk askerleri hatırasına tiklenilgen Abide aramlavı aqqında malümatnı teşkerecek. Abide işaretini ise yol işleri İdaresi bunıñ kibi işaretlerni Rusiyeli işaretlerge almaştıruv umumşeer tedbirleri çerçivesinde alıp taşladı», – aytıla beyanatta.
Qırım.Aqiqat saytınıñ malümatına köre, Aqyarda Qırım cenki (1853-56ss) vaqtında elâk olğan türk asker ve zabitlerniñ hatırasına pekitilgen Abidege yol köstergiçlerini devirdiler. Yol işaretleri Sapun-dağdan Aqyarğa olğan yol etrafında yerleştirilgen edi ve işbu Abidege yol köstere ediler. Abideni ise aramladılar.
Bunı Qırım Azerbeycan cemaatçılığınıñ başı Ragim Gumbatov bildirdi.
Qırım cenkinde elâk olğan türk askerleriniñ hatırasına tiklenilgen Abideni 2004 senesi sentâbr 10-da Qırım cenkiniñ 150 yıllığına bağılşlanğan tedbirler çerçivesinde açtılar.
