Roskomnadzor malümatına köre, işğal etilgen Qırımda Rusiye qanunlarına binayen, qırım matbuat vastalarınıñ tek 15% qayd olundı.
Oktâbr 13 künü Roskomnadzor matbuat kâtibi Vadim Ampelonskiy aytqanı kibi, qırım matbuat vastalarınıñ yalıñız 48 qayd olundı, – haber ete TASS.
«Ukrain reyestrniñ malümatına köre, Qırımda tahminen üç biñ matbuat vastası qayd etilgen. Añlağanımızğa köre, olardan tek 300 çalışa»,– dedi Roskomnadzor temsilcisi.
Böyleliknen, ğayrıdan tek 15% qayd etildi. Qırımnıñ Rusiye Federatsiyasına qoşuluvı aqqında Federal qanunına köre, keçici müddet 2014 senesi dekabr 31 künü bite.
«Qırım matbuat vastalarınıñ ğayrıdan qayd eilüvi aqqında meseleniñ baqıluvı 2015 senesi yanvar 1-ne qadar yekünlenmeli», – deyler idarede.
Yanvar 1-den bu ketişat içün devlet bergini alacaqlar, – dep haber ete Qırımnıñ öz başına tayin etilgen akimiyetiniñ «ruporı» Krıminform saytı.
Rusiyeniñ Jurnalist Birliginiñ halqara bölüginiñ reberi Timur Şafir qayd etkeni kibi, qırım jurnalist toplulığı rusiye toplulığı ile «faal sürette keçe». O şunı da hatırlattı ki, bu sene Qırımda birlikniñ bölügi peyda oldı ve qırım jurnalistleri umumrusiye professional birliginiñ azaları olmaqta.
«Bundan da ğayrı, regionda rusiyeli matbuat vastalarınıñ bölükleri peyda ola», – dedi Şafir.
2014 senesi mart 16 künü Qırım ve Aqyarda yarımadanıñ statusı aqqında «referendum» keçirildi. Onıñ neticesinde Rusiye Qırımnı öz terkibine qoştı. Ne Ukraina, ne Avropa birligi, ne AQŞ neticelerni tanımadı ve bunı Rusiye tarafından Qırımnıñ işğali olaraq sayalar.
