Qırımda, keçici müddet devamında, yasaqlanğan edebiyatnıñ tutıp alınuvına moratoriy kirsetildi. Bu kibi malümatnı Saudiy Arabistandan, hacılıqtan, qaytqan qırım musulmanları ile körüşüvde Qırım Cumhuriyetiniñ başı Sergey Aksönov bildirdi, dep haber ete RİA Novosti.
Neşirniñ malümatına köre, evel yarımadanıñ bir qaç rayonında yaşağan musulman qorantaları Aksönovğa Rusiyede ve endiden yarımadada da yasaq etilgen edebiyatnıñ qıdıruvı ile keçirilgen tintüvlerge şikâyet etken ediler.
«Edebiyatnıñ tutıp alınuvı ile iç bir taqiqat tedbirleri olmaycaq. Normal barışıq şekilge keçmek içün vaqıt beremiz. Bizde keçici devir olmalı, Rusiyede olğanımıznı añlamaq kerekmiz», – dedi Aksönov.
Avgust ayında Qırım Müftiyatı Rusiyede yasaq olğan islâm edebiyatnıñ cedvelini tizgen edi. Aynı yasaqlanğan edebiyat qırımtatarlarnıñ evlerinde, cami ve medreselerde keçirilgen tintüvlerge sebep edi.
