Aqyarda Qırım cenki (1853-56ss) vaqtında elâk olğan türk asker ve zabitlerniñ hatırasına pekitilgen Abidege yol köstergiçlerini devirdiler. İşaretler Sapun-dağdan Aqyarğa olğan yol etrafında yerleştirilgen edi ve işbu Abidege yol köstere ediler. Abideni ise aramladılar.
Bunı Qırım Azerbeycan cemaatçılığınıñ başı Ragim Gumbatov bildirdi.
«Al-azırda yol köstеrgiçlerini devirip, alıp kettiler, aqyar akimiyetiniñ avalesi olmalıdır. Elâk olğan askerlerge muqaytlıq ile yanaşqan şeerde bu kibi areketler tasavur etilmegen bir şeydir», – dey Gumbatov.
Bu areketni o, Rusiye prezidenti Vladimir Putin «kendi dostu» olaraq sayğan prezidentniñ memleketine qarşı sayğısızlıq kibi tanıy.
«Bundan da ğayrı, Abideni de aramladılar – baş taşlarda olğan ay ve yıldızlarnıñ işaretleri qırıldı ve Abide etrafında cayratıldı», – qayd ete Gumbatov.
Onıñ fikrine köre, buña Türkiyeniñ munasebeti menfiy olacaqtır, çünki bu memlekette elâk olğan askerlerniñ hatırasını muqatlıqnen saqlaylar ve bu areketler halqara davağa çevirile bilecek.
«Bu sebepten sualler peyda ola. Aqyarda bunıñ ile sıñırlanırlarmı? Eger de «Rus şanı olğan şeer»ge nasıldır bir «natsmen» ve «burjuy»larğa ait olğan abideler lâyıq olmağanını tüşünseler? Ve azerbeycan, gürci, ermeni, inglizlerge qoyulğan abidelerni yoq etmege başlasalar?!», – dey Gumbatov.
Qırım cenki vaqtında elâk olğan türk askerlerine Abide Aqyarda yerleşe. Aqyarnıñ 1854-1856 ss muasarasında elâk olğan askerlerni türk orduları bulunğan yerlerniñ civarında köme ediler.
