Aqmescit ava limanı zemaneviy havfsızlıq tertibatını elde etecek. O bütün rusiyeli qaidelerine riayet etecek, em de bütün zapt, terakt ve diversiyalardan qoruycaq.
Bunı İzvestiya bildire.
Ava limanını «2020 senesine qadar Qırım Cumhuriyeti ve Aqyar şeeriniñ içtimaiy-iqtisadiy inkişafı» leyhası çerçivesinde zemaneviyleştirecekler.
Devlet dumanıñ naqliyat boyunca komitetiniñ reis muavini Mihail Brâçak aytqanı kibi, ava limanınıñ qoruv tertibatına 886,8 mln ruble ayırılacaq eken.
O şunı da bildirdi ki, 2015 senesi ava limanı havfsızlıq programmasına 40 mln ruble, 2017 senesi - 846,8 mln ruble alacaqtır.
Neşirniñ yazğanı kibi, bu parağa zemaneviy tehnika satın alınacaq. İlk nevbette, ava limanında videonezaret tertibatı olacaq, o telükeni belgilemege imkân berecek. Zapt etüvge qarşılıqnı köstermek içün yañı isar qurulacaqtır.
Ava limanında zemaneviy radiolokatsion donatuv olacaq – o ava obyektlerni «idare etecek». Bina ve yolcularnıñ havfsızlığı içün yañı skanerlerni satın alacaqlar. Olarnıñ yardımı ile çeşit himik aletlerni, şu cümleden patlav aletlerini tapmağa mümkün olur.
