Link açıqlığı

Bekirov: Rusiye akimiyeti özünden qabaatnı almağa istese, qırımtatarlarnı esirge alğanlarnı tapıp, cezalamaq kerek


Yarımadada qırımtatarlarnıñ ğayıp oluvı Rusiye itibarına halqara toplulığı ögünde menfiy tesir eter, dep tüşüne Qırım tamır halqlarnıñ destek ve taqiqat halqara fondınıñ müdiri Nadir Bekirov.

«Qırımda da bu al olğanı pek yaramay. Böyle ameliyat Şimaliy Kavkazda da bar edi. Eger de Rusiye akimiyeti, regional akimiyeti de, bu al Qırımda Rusiyeniñ peyda oluvı ile bağlı olmağanını tüşünse, bunı izaatlamaq kerek. Bu cinayetçilerni tapıp, cezalamaq kerek. O vaqıt bu vaziyet Rusiye siyaseti ile bağlı olmağanına inanırmız», – dedi Bekirov Qırım.Aqiqat jurnalistlerine.

«Referendum» vaqtına Qırımda Ukraina tarafını tutqan insanlarnı tutıp esirge ala ediler, döge ediler, soñra ise bazıları cansız alda tapılğan edi.

İşbu areketler alâ daa devam ete, qırımtatarlarğa basım arta.

Şu cümleden, sentâbr 27 künü Qarasuvbazar rayonı Sarı-Su köyünde belgisiz şahıslar İslâm Cepparov ve Cevdet İslâmovnı tutıp esirge aldılar. Olarnı alâ daa tapmadılar.

Sentâbr 29 künü Kezlevde qırımtatarı Edem Asanov ğayıp oldı. Oktâbr 6 künü onı cansız alda taptılar. Birazdan qırımtatar milliy Meclisinde Qırım.Aqiqatqa oğlan asılğan alda tapılğanını bildirdiler.

XS
SM
MD
LG