Qırımtatar milli areket iştirakçisi, qırımtatar milliy Qurultayınıñ Merkeziy saylav komissiya reberi Zair Smedlâyev «halq imayesi» vekilleriniñ afu etilüvi aqqında qanun olarğa ileride de Qırımda qanunsızlıqnı etmege izin berecegini tüşüne.
Bunı o Qırım.Aqiqatqa bildirdi.
«Reşat Ametov öldürilgeninden endi yarım yıldan ziyade keçti, faqat bu vaqia boyunca kimse mesüliet çekmedi. Bundan da ğayrı, Qırım Devlet Şurasında işbu halq imayesine 2015 senesi yanvar 1-ne qadar qanunsızlıqnı etmege izin bergen bir vesiqa peyda oldı. Yani, insanlarnı öldürip, soñra olar memleketniñ territorial bütünligine zarar ketire bilecegini aytmaq mümkündir», – dedi Smedlâyev.
Onıñ aytqanına köre, Qırımda olğan cinayetlerni sımarlağan ve amelge keçirgenler mesüliet çekmeli.
Qırım «Devlet Şurası» Rusiye Devlet dumasına bu sene fevral ayından yapqan areketleri içün «halq imayesi» vekilleriniñ afu etilmesi ile bağlı qanun leyhasını kirsetti.
Mart ayından yarımаdada vatandaşlarnıñ aq ve serbestliginiñ bozuluvı qayd etile. İşbu areketlerde Qırım «halq imayesi»niñ iştiragi de büyük.
«Referendum» vaqtına Qırımda Ukraina tarafını tutqan insanlarnı tutıp esirge ala ediler, döge ediler, soñra ise bazıları cansız alda tapılğan edi.
İşbu areketler alâ daa devam ete, qırımtatarlarğa basım arta.
Şu cümleden, sentâbr 27 künü Qarasuvbazar rayonı Sarı-Su köyünde belgisiz şahıslar İslâm Cepparov ve Cevdet İslâmovnı tutıp esirge aldılar. Olarnı alâ daa tapmadılar.
Sentâbr 29 künü Kezlevde qırımtatarı Edem Asanov ğayıp oldı. Oktâbr 6 künü onı cansız alda taptılar. Birazdan qırımtatar milliy Meclisinde Qırım.Aqiqatqa oğlan asılğan alda tapılğanını bildirdiler.
