Qırım «spikeri» Vladimir Konstantinovnı Ukraina gimni ile qarşılağan Qırım müendis-pedagogik universitetiniñ sudentlerini qara cedvelge kirsettiler ve sıq sürette sorğuğa çağıralar.

Bunı jurnalist Osman Paşayev bildirdi.

«KMPU studentleri «Qırım devlet şurası spikeri» Konstantinovnı Ukraina gimni ile qarşılağanı aqqında yazğanımnı hatyrlaysıñızmı? Bütün studentlerni internette olğan foto ve video boyunca tanıp, FSB qara cedvelge kirsetti ve endi olardan işbu numayışnıñ tekşilâtçısını çaqmağa talap eteler. İşğalci ve moskvalı gestapocilerge oca Mustafa (Servinoviç) Cilâci yardım ete, onıñ iş odasında işbu sorğular keçirile. Mahsus hızmetleri Ukraina gimnini icra etken 17-18 yaşında olğan qız ve oğlanlarnı sorğuğa çekkeni ile oğraşsa, demek «Rusiye ulu devlettir», – dep yazdı öz Facebook saifesinde Paşayev.

Ukrainskaya pravda gazetasına bergen izaatında o, studentlerni endi 2 afta devamında sorğuğa çekkenleri aqqında bildirdi.

Qırım.Aqiqat bergen malümatına köre, sentâbr başında QMPU-ğa kelgen «spiker» Vladimir Konstantinovnı studentler Ukraina gimni ile qarşıladılar.

Ukraina gimniniñ icrası ile video içtimaiy ağlarda peyda oldı, amma birazdan silindi.

Studentlerniñ taqibi aqqında qırımtatarlarnıñ milliy yetekçisi Mustafa Cemilev de bildirgen edi.