Rusiye kütleviy haber vastaları Qırımdaki radikal musulmanlar faalleşkeni aqqında öşek tarqatıp, Rusiyeni Ğarpta terrorizmge qarşı küreşken memleket olaraq tanıtacaq ola.
Bu aqqında Qırımtatar Milliy Meclisiniñ reisi Refat Çubarov ZN.UA intervyüsında ayttı.
Çubarovnıñ bildirgenine köre, Rusiye kütleviy haber vastaları yarımadada islamistik areketler faalleşkenini ve terroristik aktlar telükesi aqqında basabas aytalar. Olarnıñ malümatına köre, Suriyede cenkleşken qırımtatarlar yarımadada boyevikler taqımlarına birleştiler, em de Lvov vilâyetindeki Ukraina havfsızlıq Hızmetinde idmanlar keçirile.
Çubarovnıñ zanınca, Rusiye siyasiy davalarda artıq faydalanğan soñki usullarnı qullana.
Çubarovnıñ aytqanları oktâbr 8-de «Nezavisimaya gazeta» rusiyeli gazetasında derc etilgen «Qırımdaki islamistler bir şeyge azırlıq köreler» maqalesinden alındı. Onıñ müellifi qırımtatarlarnıñ bir qısmı radikalizm tarafına keçeceklerini tahmin ete eken.
