ATR qırımtatar telekanalını iç kimse qapatmaycaq, o, Rusiye qanunları boyunca ğayrıdan qayd etilmek kerek, dep tüşüne Qırım «Devlet şurasınıñ» informatsion siyaseti, bağ ve kütleviy alâqalar boyunca Komitet reisi Sergey Şuvaynikov.
Bu aqqında o Gravitatsiya yayınınıñ efirinde, em de Facebooktaki saifesinde bildirdi.
«Telekanal malümat saasında Rusiye qanunları, em de vatandaşlar ve cemaatnı ekstremizm ve diger menfiy şeylerden qoruğan qanunlarğa riayet etmeli», – dedi Şuvaynikov.
«Prokuratura» ve Taqiqat komitetiniñ telekanalğa nisbeten yapqan tenbisini Şuvaynikov «profilaktik tedbirler» dep adladı.
Oktâbr 8-de ATR telekanalı beyanatını aydınlatıp, tezden qırımtatar telekanalını qapata bileler, dep bildirdi.
Qırım akimiyeti ve onıñ tarafdarları bu mevzuda bir sıra tenbilerni aydınlattılar. Böylece, sentâbr 24-te telekanal reberligi Ekstremizmge qarşı areketler Merkezinden «milliy ve diniy mensüplik boyunca ola bilecek ayırımlar aqqında fikirni tarqata, cemaat arasında Rusiyege qarşı keyf olmasına sebep bere, qırımtatar cemaatçılığı içinde akimiyet ve onıñ areketlerine sayğısızlıqnı doğura, böyleliknen ekstremist faaliyetiniñ telükesi peyda ola» kibi mektüp aldı. Telekanal yolbaşçılığından vesiqalarnı ve kanalda işlegen bütün insanlarnıñ cedvelini talap ettiler.
