Qırım şeer reisleri Aleksandr Bartenev, Kirill Köstenko ve Oleg Kolodâjnıynıñ öldürüvleri boyunca açılğan cinaiy işler ögrenilmedi.
Bu aqqında Qırım «akimiyetiniñ» ruporı olğan «Krıminform» saytı Qırım Cumhuriyeti boyunca Rusiyeniñ Taqiqat komiteti baş taqiqat idaresiniñ reberi Mihail Nazarovnıñ aytqanlarına esaslanıp bildire.
«Üç cinaiy iş de Rusiye qanunları boyunca öldürüvler olaraq tanıldı. Olarnı ögrendiler, dep şimdilik aytıp olamayım», – dep qayd etti Nazarov.
Onıñ bildirgenine köre, al-azırda cinaiy işler taqiq etile, cinayetçilerniñ şahsiyetlerini belgilemek içün bir sıra tedbirler alıp barıla.
Hatırlatamız, Saq rayonınıñ Novofödorovka qasaba yolbaşçısı Oleg Kolodâjnıy
2010 senesi iyün 29-da öldürildi. O, saba çoq qatlı evden çıqıp, maşinasına miner eken, onı atıp öldürdiler.
Simeiz qasabasınıñ yolbaşçısı Kirill Kostenko 2013 senesi fevral 26-da oña qarşı avtomattan açılğan ateş neticesinde maşinasında can berdi.
Kefe şeer reisi Aleksandr Bartenev 2013 senesi iyül 27-de gece öldürildi. O, alğan yaralardan sebep hastahanede keçindi.
