Link açıqlığı

Qırımtatar mekteplerinden birisiniñ talebelerini telüke aqqında tenbiyelediler


Cumaaqşamı künü, oktâbr 9-da, Qırımnıñ Qurman rayonı Büyük-Onlar qasabasında yerleşken qırımtatar milliy mektebiniñ memuriyeti telebeler ile telüke aqqında subetni keçirdi. Yaqında qasabada belgisiz şahıslar balalarnı maşinağa oturtmağa tırışqan ediler, subetniñ sebebi bu oldı. Bunı 15 minut haber agentligi bildire.

№3 mektep ocaları añlatqanı kibi, oktâbr 8 künü Büyük-Onlar qasabası Kurçatova soqağında olğan adise aqqında söz kete. Belgisiz şahıslar qurucılıqta oynağan balalarnı maşinağa oturtmağa tırışqan ediler. Bunıñ ile olar talebelerge tatlılıqlarnı teklif etkenler, amma balalar qaçıp oldılar. Bunı körgen adam maşina (olğan malümatqa köre, VAZ-2115 edi) «maden» renkte ve farqlı nomeralar ile olğanını bildirdi. Bütün malümatnı uquq qorçalayıcılarğa bildirdi.

Qasabanıñ «politsiya» nevbet bölüginde bu aqta haberleri olmağanını bildirdiler.

Öz nevbetinde, №3 mektebiniñ müdiri Alme Semedlâyeva bu aqta haberdar olğanını, amma bu diger mektep talebeler ile olıp keçkenini bildirdi. Amma mektep memuriyeti episi bir talebeler ile subetni keçirmege qarar aldılar. Bugün ana-babalar ile toplaşuvnı keçirip, olarğa balalarnı mektepten qarşılamağa rica ettiler.

«Tanış olmağanlar ile laf etmege, çeşit maşinalarğa oturmağa mümkün olmağanı aqqında hatırlattıq»,– dedi Alme Semedlâyeva. Onıñ malümatına köre, politsiya bu ziddiyet aqqında malümatnı diqqatqa alacaq eken.

Belli olğanı kibi, sentâbr 27 künü Qarasuvbazar civarında eki yerli sakin Cavdet İslâmov ve İslâm Cepparov yoq oldılar.

XS
SM
MD
LG