Resmiy Kiyev Rusiyeni qabul etmegen qırımtatar milliy areketiniñ bir qısmını resurslarnen temin etti. Bunı «Qırım Cumhuriyeti Devlet Şurasınıñ» reisi Vladimir Konstantinov Rusiye Federal Meclisi yanında qanun çıqarıcı Keñeş Prezidiumı ve Federatsiya Şurasınıñ Reisi yanında Mesleat Şurasınıñ toplaşuvında ayttı. Konstantinovnıñ çıqış metni «Devlet şurasınıñ» saytında derc etildi.
Konstantinovnıñ qayd etkenine köre, Qırım akimiyeti «eski ıncıtuvlar içün intiqam almaycaq».
Onıñ aytqanına köre, qırımtatarlarnıñ 50 fayızından ziyade Qırımdaki parlament saylavlarında iştirak etti. Konstantinovnıñ fikirince, bu netice qırımtatarlarnıñ cumhuriyetniñ Rusiye akimiyetine olğan itibarını köstere.
Malüm olğanı kibi, oktâbr 6-da qırımtatarlarnıñ milliy lideri, qırımtatar halqınıñ işleri boyunca Ukraina prezidentiniñ vekâletlisi Mustafa Cemilev onıñ halqına nisbeten işğal etilgen yarımadada repressiyalar quvetleştirilmesi aqqında bildirdi. Onıñ aytqanına köre, qırımtatar halqınıñ total sürgünlik telükesi bar.
Cemilevniñ qayd etkenine köre, Qırım işğalinden itibaren 18 insan ğayıp oldı, olardan çoqusı – qırımtatarlardır.
