Link açıqlığı

Qırımtatar Milliy Meclisiniñ tışqı alâqalar bölük reberi Ali Hamzin 25 yaşında qırımtatar gençi Edem Asanovnıñ ölümi zorbalıqsız olğanında şübelene.

Bu aqqında o Qırım.Aqiqat mühbirine bildirdi.

Onıñ aytqanına köre, gençniñ ölüminen bağlı resmiy malümatta bir sıra añlaşılmağan yerler mevcut.

Salı künü, oktâbr 7-de, Saqtaki mezarlıqta oktâbr 6-da Kezlev etrafındaki baqımsız bir şifahanede asılğan alda tapılğan 25 yaşında Edem Asanovnı defn ettiler. İlk malümatlarğa köre, genç tezkere qaldırıp, bir kimseni onıñ ölüminde qabaatlamamağa rica etti ve kendisini astı.

Lâkin soy-sopları ve semetdeşleri Edem kendisini öldürdi degen fikirnen razı degiller. Bunı cenazede qırımtatarlarnıñ lideri Mustafa Cemilevniñ apayı Safinar Cemileva ayttı.

Gençniñ cesedi tapılğan soñ, Qırımtatar Milliy Meclisiniñ reisi Refat Çubarov Qırım akimiyeti onıñ ölümi zorbalıqsız olğanını bildirecek, dep tahmin etken edi.

Elâk olğannıñ aqrabası onıñ ölümi ne siyaset, ne de cinayetnen bağlı olmağanını bildirip, taqiqatqa iddialar olmağanını aytalar.

XS
SM
MD
LG