Link açıqlığı

Human Right Watch eksperti: qırımtatarlarnıñ esir aluv ve ölüm taqiqatı semereli degil


İşğal etilgen yarımadada qırımtatarlarnıñ esir aluv ve ölüm taqiqatı semeresiz alıp barıla, dep tüşüne dünyanıñ eñ meşur uquq qorçalayıcı teşkilâtlarından biri Human Right Watch eksperti Yuliya Gorbunova.

«Bizler mart ayında Qırımda oldıq ve samooborona taqımları iştirak etken zorbalıq ğayıp oluvları aqqında yazdıq, Qarasuvbazar civarında ölü tapılğan Reşat Ametovnıñ işi aqqında da tafsilâtlıca yazğan edik. Bilgenimiz kibi, episi bu vaqialar boyunca taqiqatlar semereli degil edi. Eñ azından, taqiqat neticelerini ve cinayetçilerniñ mesülietke çekmesini biz körmeyik», – dep qayd etti Gorbunova.

Onıñ qayd etkenine köre, adamlar ğayıp ola, lâkin olarnı kerekli qadar qıdırmaylar.

Onıñ malümatına köre, Human Right Watch teşkilâtı bu sene mart ayından berli yarımadada 8 qırımtatarı ve Ukrainağa qol tutqan faal, mayıs ayından berli – 7 kişi ğayıp olmasını qayd etti.

Qırımtatar halqınıñ lideri Mustafa Cemilev 18 nefer qırımtatarınıñ ğayıp olması aqqında haber etken edi.

Human Right Watch teşkilâtı bildire ki, işğal etilgen Qırımda adamlarnıñ ğayıp olması «Ukrainağa qol tutqan er bir adam, şu cümleden qırımtatarlarğa qarşı duşmanlıq ve qorqu müiti» peyda olmasınıñ sebep ola.

XS
SM
MD
LG