Moskvanıñ Ukrainağa nisbeten siyaseti deñişmese, Rusiyege qarşı cezalar quvetleştirile bile. Bu aqqında Poloniya tış işler naziri Gjegoj Shetina oktâbr 7-de Polsat News telekanalına bergen intervyüsında bildirdi, dep haber ete Azatlıq Radiosı.
Ukraina şarqında ateş toqtatılmasınıñ bozulması, onıñ aytqanına köre, Moskvağa qarşı diplomatik basqını quvetleştirdi. Ğarbiy devletler Rusiyeni separatistlerge qol tutuvda qabaatlaylar, Kreml bunı red ete.
«Bütün avropa memleketleri, Avstraliya, AQŞ ve Kanada ile birlikte aynısını aytalar. Serbest alem bunıñ kibi siyasetke «yoq» dep ayta», – dep qoştı nazir.
Shetina sentâbr ayında tışqı işler naziri vazifesine tayinlendi. Ondan evel bu vazifeni Radoslav Sikorskiy eda ete edi, şimdi o Poloniya parlamentiniñ spikeri ola.
