Oktâbr 22-den itibaren Moskvada Eski Qırımdaki Özbek Camisiniñ 700 yıllığına bağışlanğan «Eski fotoresimlerdeki Qırım camileri» adlı sergi açılacaq, dep haber ete QHA.
Sergi temeli al-azırda Bağçasaray tarihiy-medeniy qoruğı ve Moskvadaki RAN Arhivinde olğan qazma işleriniñ fotoresimleri olacaq. Bundan ğayrı, keçken asırnıñ 20-nci seneleriniñ Qırım camileri ile eski fotoresimler numayış etilecek.
Sergi maqsadı – yarımadanıñ farqlı devirlerinde olğan islâm mimarcılığınıñ yadikârlıqlarını köstermektir.
«Qırım camileri: Özbek Camisiniñ 700 yıllığı munasebetinen» leyhası Bağçasaray tarihiy-medeniy qoruğı (Bağçasaray, Qırım), RAN Arhivi (Moskva), «Marcani» Fondu (Moskva) ve Bütün Rusiye çetel edebiyat devlet kütüphanesi (Moskva) beraber yapqan bir iştir.
