Baqımsız şifahanede ölü tapılğan 25 yaşında Edem Asanovnı birisi öldürdi kibi tüşünmege sebep yoq.
Bu aqqında Saq rayonınıñ regional Meclis reisi Eskender Bilâlov Aqmescitteki matbuat konferentsiyasında ayttı, dep haber ete Tsentr jurnalistskih rassledovaniy.
«Men birinci künlerinden başlap qıdıruv işlerinde iştirak etken edim, Edemni tapqan soñ, men taqiqatçılarnen laf ettim, tünevin keçirilgen mahkeme-tibbiyet teşkerüvi kösterdi ki, bu ölüm zorbalıq oldı. Bundan ğayrı, tezkere bar. Onıñ mündericesini aytıp olamayım, lâkin onıñ qararı olğanı bellidir. O, bunı kendisi yaptı», – dep ayttı Belâlov.
Elâk olğannıñ aqrabası onıñ ölümi ne siyaset, ne de cinayetnen bağlı olmağanını bildirip, taqiqatqa iddialar olmağanını aytalar.
Salı künü, oktâbr 7-de, Saqtaki mezarlıqta oktâbr 6-da Kezlev etrafındaki baqımsız bir şifahanede asılğan alda tapılğan 25 yaşında Edem Asanovnı defn ettiler. İlk malümatlarğa köre, genç tezkere qaldırıp, bir kimseni onıñ ölüminde qabaatlamamağa rica etti ve kendisini astı.
Lâkin soy-sopları ve semetdeşleri Edem kendisini öldürdi degen fikirnen razı degiller. Bunı cenazede qırımtatarlarnıñ lideri Mustafa Cemilevniñ apayı Safinar Cemileva ayttı.
Gençniñ cesedi tapılğan soñ, Qırımtatar Milliy Meclisiniñ reisi Refat Çubarov Qırım akimiyeti onıñ ölümi zorbalıqsız olğanını bildirecek, dep tahmin etken edi.
