«Yevromaydan» ukrain areketi, azeri uquq qorçalayıcı Leyla Yunus ve kongolez ekimi Deni Mukvene Avropa parlamenti tarafından berilgen «Fikir serbestligi içün» Andrey Saharov adına mukâfatına namzet olaraq kösterildiler. Bu aqqında Azatlıq Radiosı bildire.
«Yevromaydan» areketi Ukrainada Avropa integratsiyasına qol tutmaq maqsadında keçirilgen narazılıqlar neticesinde peyda oldı. Avropa parlamentiniñ beyanatında aytıla ki, «Yevromaydan» areketini jurnalistler Mustafa Nayyem ve Tatyana Çornovol, yırcı ve «Yevrovideniye» yarışınıñ ğalibi Ruslana Lıjiçko ve faal Yelizaveta Şepetilnikova temsil eteler.
Leyla Yunus kendi memleketinde insan aqlarını qorçalay, o, Azerbaycanda siyasiy mahbüsler cedvelini tizdi. Leyla Yunus ve onıñ aqayı apste bulunalar. Olarnı devlet hainliginde qabaatlaylar.
Kongolez ekimi Deni Mukvege Kongo Mustaqil cumhuriyetinde namusına keçüvden zarar körgen insanlarğa yardım etmek içün hastahane açtı.
Saharov mukâfatınıñ laureatı oktâbr 16-da aydınlatılacaq.
Avropa parlamenti tarafından tesis etilgen «Fikir serbestligi içün» mukâfatı – 50 biñ yevro miqdarında – er yıl insan aqları ve fikir serbestligi saasında ğalebeler içün berile.
