Qırımnıñ qırımtatar ealisinde bütün Qırım ealisini cedvelge aluv tedbirlerini boykot etmek içün bir de bir teşviqat keçirilmey.
Bu aqqında Qırım musulmanları müfti muavini Esadullah Bairov Aqmescitte tögerek masada bildirdi, dep haber ete Qırımnıñ öz başına ilân etilgen akimiyet ruporı Krıminform saytı.
Onıñ aytqanına köre, qırımtatarlar, şu cümleden, Qırımnıñ musulman cemiyetleri ealini cedvelge aluv tedbirleriniñ müimligini añlaylar ve bu esnasqa qoşulacaqlar.
«Ealini cedvelge aluvnıñ neticeleri ve qırımtatar ealisinen dos-doğru bağlı olğan Qırımdaki demografik vaziyetniñ deñişmesi, er kesni meraqlandıra», – dep tekrarlay Bairovnıñ aytqanlarını neşir.
Rusiye tarafından işğal etilgen Qırımda oktâbr 14-25 künleri ealini cedvelge alacaqlar. Vatandaşlarğa 33 sualden ibaret anketa berilecek. Rusiye ükümeti bildirdi ki, Qırım federal okrugında ealini cedvelge almaq içün 387 mln. ruble ayırıldı.
Rusiye prezidenti Vladimir Pütin yarımada inkişafı içün Qırım ealisini cedvelge almaq kerek, dep bildirdi.
Qırımtatar Milliy Meclisiniñ reisi Refat Çubarov yarımada ealisini cedvelge aluv esnasında qırımtatarlar ve Qırımnıñ diger sakinlerine qarşı repressiyalar pâla bile, dep bildirgen edi.
