YouTube ağında al-azırda Moskva SİZOsında bulunğan Qırımnıñ faşizm küreşçisi Aleksandr Kölçenko aqqında vesiqalı film peyda oldı. Bu aqqında haber «Svobodu Aleksandru Kolçenko!» Facebooktaki gruppasında bildirdi.
Kinonı faalniñ dostları ve ortaqları çıqardılar. Filmde Aleksandr aqqında onıñ anası, yaqın dostları ve «Antifa» areketiniñ Aqmescit iştirakçileri ikâye eteler.
«Bizim kvartiramız küçük olsa da, evimizde er daim gençler çoq edi. Saşa bu dostluqnıñ qıymetini bile edi, dostlaşmağa bile edi. Ümüt etem ki, ümüt ve aqıl yeñerler, ve tezden er şey bitecek. Biz epimiz buña pek işanamız», – dep ayta Aleksandrnıñ anası filmde.
Kölçenkonıñ dostları ve ortaqları filmde onıñ cemaat faaliyeti, meraqları aqqında tarif etip, onıñ tezden azatlıqta olacağına ümüt beslegenini aytalar.
Kölçenko 2014 senesi mayıs ayında işğal etilgen Qırımda teraktlarda qabaatlanğan ve yaqalanğan Ukraina vatandaşlarınıñ arasında edi. Olarnıñ arasında – ukrain rejissöri Oleg Sentsov.
Taqiqat bildire ki, Sentsov ve Kolçenkonıñ «Pravıy sektor» areketine alâqaları bar, ve bu qabaat içün esas sebeplerden biri oldı. Aqraba ve uquq qorçalayıcılar bu qabaatlarnıñ sebepsizligini qayd eteler.
Taqiqatçılar ve prokuratura yaqalanğan şahıslarnıñ Ukraina vatandaşlığını tanımağa istemeyler, olar ise Rusiye vatandaşlığını almadılar ve Ukraina vatandaşlığından vazgeçmediler.
