«Rusiye Federatsiyasınıñ Qırım Cumhuriyeti boyunca Taqiqat komitetiniñ» baş taqiqat idaresi sentâbr 27-de Qarasuvbazar civarında ğayıp olğan Cevdet İslâmov ve İslâm Cepparovnıñ fotoresimleri ve belgiler malümatlarını aydınlattı.
İslâmovnıñ qara sport ştanları, boz kurtkası, kirli yeşil renkte beysbolka, «Adidas» boz krossovkaları bar edi. Yanında qara renkli «SONY» sensorlı cep telefonı bar edi. «Taqiqat komitetiniñ» saytında aytıla ki, ekinci ğayıp olğan insan İslâm Cepparovnıñ yeşil ştanları, qara payta, qara kurtkası, qara sport ayaqqabı bar edi.
Fotoresimleri «Taqiqat komiteti» resmiy saytınıñ «Ğayıp olğanlar» bölüginde derc etildi. Malüm olğanı kibi, oktâbr 6-da Ukraina Baş prokuraturası işğal etilgen Qırımda eki genç qırımtatarını esir aluv boyunca cinaiy taqiqatqa başladı.
