Saq şeeri – Salı künü, oktâbrniñ 7-nde Saq şeeriniñ qabristanında Edem Asanovnı kömdiler. Onıñ ceseti Kezlevniñ civarında baqımsız binada asılı tapıldı. Evelki tahminlerge köre, genç öz-özüni astı ve bundan evel tezkere yazıp qaldırdı. Amma, Edemniñ tuvğanları ve soyları, yaş oğlan öz-özüni öldürgenine işanmaylar.
Edem Asanovnen vedalaşmaq içün yüzden ziyade insan keldi. Onıñ babası Ablâziz ağa közyaşlarını tutalmadı.
Küler yüzlü, şeñ, muzıka ve sportnen oğraşqan edi – Edemniñ dayısı Ridvan Caparov merhumnı böyle şekilde hatırlay. Aytqanına köre, facia olacağını bir kimse tüşünmegen.
Tuvğanlar bildirgenine köre, soñki kere Edemni sentâbr 29 künü körgenler. Şaatlarnıñ malümatına binaen, şu künü yaş Kezlevniñ avtostantsiyasında buluna edi. O vaqıttan berli ondan haber kelmedi. Asanovnıñ «VKontakte» saifesinde onıñ soñki kere bulunğan vaqtı qayd etilgen: sentâbr 29 künü 6:40.
Soñra, yaqınları oğlannıñ yoqsuzlığınen qasevetlenip, qorçalayıcı organları ve matbuat vastalarına Edem ğayıp olğanını haber ettiler. Künler keçti, onıñ aqqında iç bir malümat kelmedi. Bağ yoq edi. Bir aftadan soñ, Edemniñ ölgeni belli oldı.
Merhumnıñ dayısı aytqanı kibi, cesetni Kezlev civarındaki baqımsız binada oynağan balalar taptılar. Bu qorqunçlı tapılma aqqında politsiyağa haber ettiler. Facia yerinde Edemniñ babası bulundı. Amma, tavsilâtlı malümatnı bildirmedi. Belli olğanı kibi, Asanovnıñ ceseti asılı edi. Anda o bir afta asılı turdı. Em de tezkere de bar edi. Onıñ mündericesi aqqında aileniñ dostu Seyare İsmailova ikâye etti. «Tezkerede, menim ölümim içün bir kimseni qabaatlamañız, dep yazılğan edi», – dedi qadın mühbirlerge. Amma, yaş yigit öz özüni öldürgeninde Seyare hanım şübelene.
«Edem – aliy tasil aldı, musafirhane hocalığı institutını tamamladı, Kezlevdeki «Ceval» qavehanesinde, soñra «Freşte» çalıştı, soñ Primoryede qurtarıcı oldı. O anasına yardım etmege tırıştı, ana-babasını, qorantasını pek seve edi», – dey İsmailova.
Aynı zamanda, «15 minut» saytı öz qaynaqlarına tayanıp, Edem hasta olıp, artıq yaşamağa istemegeni aqqında bildirile edi. Aynı zamanda, ana-babası ve dostları bundan haberleri yoq. Qorçalayıcılar analiz yapmaq içün materiallar alıp, teşkerüvler yapacaqlar, olarnıñ neticelerine köre, yaşnıñ bir de bir hastalığı olğanı belli olacaq.
Qaynaqnıñ malümatına binaen, merhumnıñ cesetinde iç bir yara, ya da zorbalıq izi yoq edi. «Şeyleri yahşı alda, bürüşmegen ve yırtılmağan. Qol, parmaq ve bütün bedeni siyarmağan», – dep bildirdi qaynaq.
Siyasiy teşkilâtlarğa qoşulmadı
Er alda tuvğanları ale daa yüz bergen vaqianı aqıllarına sığdırıp olamaylar: nasıl etip te öyle şeñ yigit öz-özüni öldürdi dep tüşüneler. «Pek ağır, er keske qıyın. Ölecegini iç kimse tasavvur etip olamay edi, nasıl etip olğanını añlamayım, – dey merhumnıñ dayısı. – Edem siyasiy teşkilâtlarğa qoşulmağan edi, iç bir arekette iştirak etmedi».
Tuvğanlarnıñ sözlerini gençniñ «VKontakte» saifesi tasdiqlağan kibi körüne. Mında em yalıda, em dostlarnen, Edem çalğan muzıkal taqımnıñ resimlerini körmek mümkün. Er birinde yüzü küle. Ümütsizlik ve depressiya iç te duyulmay.
Yaş öz-özüni öldürgenine milliy lider Mustafa Cemilevniñ apayı Safinar Cemileva da işanmay.
«Faciadan evel Edem sigaret satın alğan. Adam özüni öldürecek olğan olsa, sigaret alırmı? Ayatından vazgeçmege istegen adam ümütsizlikke qaplana, bunı birden körmek mümkün, – dey Cemileva. – Onı, qırımtatarı olğanı içün (belgisizler. – Müel. qaydl.) yaqaladılar. Men böyle tüşünem».
Onıñ fikirince, yigitni öldürmeleri mümkün, amma onıñ ölümini - suiqast kibi köstermege isterler, ve qabaatlılarnı tapmazlar. «Sovetler devrinde bir bu sistema ile küreşe edik, amma oyunnıñ qaideleri belli edi: bir de bir şeyni yapsañ, seni cezalarlar.Mında ise, qaideler yoq. Olar,cezasız qalacaqlarını bileler, istegenlerini yapalar, – dey Cemileva. – Biz yarımadada esir olıp qaldıq. Biznen esirlernen davranğanları kibi davranalar. Eñ qorqunçlısı şu ki, iç bir kimse mesülietni öz boynuna almay ve qabaatlılarnı iç bir vaqıt tapamazlar». Qadın bildirgenine köre, bu kibi vaqialar tekrarlana bile.
Qayd etmeli ki, Asanovnıñ ceseti tapılğan künü, «Zona Prava» uquq qorçalayıcı teşkilâta tarafından teşkil etilgen, «MediaZona» rusiyeli mühbirler leyhasında Aqmescitli rejissör Оleg Sentsov «kirgen» «Pravıy sector» diversion-terroristik gruppası» işi boyunca qabaatlanğanlarnıñ sayısı 8-ge qadar artqanını bildirgen ediler. Añılğan soy adlrından biri - Asanov edi. Bazı matbuat vastaları buña diqqat ayırdılar. Amma, Sentsovnıñ işi boyunca keçkenniñ soyadı qısmen Asanovnıñ soyadınen bir kele.
