Oktâbr 6 künü Edem Asanovnıñ ceseti yanında tapılğan tezkerede oğlan ölüminde kimseni qabaatlamamağa rica etti.
Bunı Qırım.Aqiqat saytına anasınıñ tanışı Siyare İsmailova bildirdi.
«Tezkerede: «ölümimde kimseni qabaatlamañız» yazılğan edi, – dedi qadın.
O şunı da qad etti ki, Edem aliy oquv yurtını musafirhane işi boyunca bitirdi ve soñ vaqıtları kezlev restoranlarında hızmetçi olaraq çalışa edi.
«Samimiy, namuslı qoranta, böyle olacağını kimse tüşünmez edi»,– dedi İsmailova.
Qırım.Aqiqat mühbiri bergen malümatına köre, Saqta keçirilgen cenazege yüzden ziyade insan keldi. Cenazeni biraz ertece başladılar.
Sentâbr 29 künü Kezlevde qırımtatar Edem Asanov ğayıp oldı, oktâbr 6 künü onı cansız alda taptılar. Qırımtatar milliy Meclisinde oğlan asılğan alda tapılğanını bildirdiler.
