Link açıqlığı

Qırımtatarlarnıñ ögünde turğan mesele: vatanda qalmaq ya da qaçmaq, dep tüşüne tarihçı


İşğal etilgen Qırımdaki vaziyet qırımtatarlar içün ciddiy mesеleni doğura: vatanda qalmağa ya da qaçmağa dep tüşüne tarihçı Gülnara Bekirova.

Bunı o Qırım.Aqiqat saytına bildirdi.

«Mustafa Cemilev ile razım, telâşlı sebepler çoqtır. Tutıp esir alınğan yaşlar aqqında bildirüvler çoq. Eñ müim mesele – havfsızlıqtır. Tekrar ola bilecek sürgünlik ile bağlı tüşünceler de bar. Tekrar sürgünlik de degil, çünki sovet zamanında qırımtatarlar añlaşılmağan avaleler sebebinden vatanğa qaytıp olamaz ediler: yani olarnıñ Qırımda yaşamağa imkânları edi sanki, amma anda qayd olunmğa çare yoq edi. Demek, Qırım qırımtatarlar içün qapalı edi», – dey o.

Bekirova sürgünlik vaqiası tekrarlana bileceginden qorqa. Mütehassıs tüşüne ki, qırımtatarlar Ukraina devletinde yaşağan vaqıtta olar telükesiz şaraitlerde yaşay ediler.

Bazar eretsi künü, oktâbr 6-da, Kiyevde matbut konferentsiyası devamında qırımtatarlarnıñ milliy yetekçisi, Ukraina prezidentiniñ qırımtatarlarnıñ işleri boyunca vekâletli Mustafa Cemilev Rusiye tarafından işğal etilgen Qırımda halqınıñ taqdiri aqqında bildirgen edi. Onıñ sözlerine köre, qırımtatarlarnıñ sürgün oluna bilecegi ile bağlı telüke bar.

Cemilev, Meclisniñ malümatına köre, Qırımda işğalden bugünge qadar 18 insan ğayıp oldı, olarnıñ çoqusı – qırımtatarlar olğanını ayttı.

Sentâbr 27-de Qarasuvbazar civarındaki Sarı-Su köyünde belgisiz şahıslar eki genç İslâm Cepparov ve Cevdet İslâmovnı esir aldılar. Olarnı alâ daa tapmadılar.Sentâbr 29 künü Kezlevde qırımtatarı Edem Asanov ğayıp oldı. Oktâbr 6 künü onı cansız alda taptılar. Birazdan, qırımtatar milliy Meclisinde oğlan asılğan alda tapılğanını bildirdiler. Tuvğanları bu malümatnı tasdiqladılar.

Edem Asanovnıñ cenazesi salı künü, oktâbr 7-de, Saq şeeri, Priozörnaya soq., 31 adersi boyunca saat 15:00 olacaq.

XS
SM
MD
LG