Aqmescit – Qırımda insanlar ğayıp olalar. Nevbetteki facia, Aqmescitte cuma künü, oktâbrniñ 3-nde yüz berdi. 23 yaşlı Eskender Apselâmov şahsiy işhanede furuncı olıp çalışa edi, işke ketmek içün evden çıqtı, amma iş yerine kelmedi. Onıñnen ne oldı ve qayda bulunğanı belli degil. Eskenderniñ ana-babası qoruyıcı organlarınıñ areket etüvini beklemeyip, Qurmandan kelip, özleri qıdıruv işlerini başladılar. Nasıl malümatnı elde etkenleri aqqında Qırım.Aqiqatqa Eskenderniñ anası – Ayşe Apselâmova ikâye etti.
– Oğluñızğa ne oldı?
– Oğlum cuma künü, oktâbrniñ 3-nde saat 13-te qurmandan Aqmescitke keti. Saat 18.00 –de aqşam şahsiy işhanede işi başlana edi. Aqmescitteki dairege kelgen soñ, onıñnen bağlandım, yahşı barıp çıqqanı, aşap, işke ketecegini ayttı. Ondan soñ, telefon açmadım, çünki gece çalışqanını bilem, nafile işten qaldırmayım, dedim. Şu künü, saat beş buçuqta, oğlum daireden çıqtı, amma işke vaqtında kelmedi. Yolbaşçısı qasevetlendi, dairege ketti, amma, anda yoq edi. Hadimlerinen beraber, oğlumı qıdırıp başladı: hastahanelerge, SİZO, morgğa telefon açtı, amma, tapalmadı. Bunı bizge ekinci künü haber etti.
– Soñ siz ne yaptıñız?
– Biz Qurmannıñ İçki İşler Rayon bölügine telefon açtıq. Anda barıp, ariza yazdıq, ve Aqmescitke keldik. Yolda ketkende, taqiqatçı telefon açıp, yerli militsiya bölügine kirmemizni rica etti. Aqmescitniñ merkeziy İİRB-de pek çoq bekledik. Konkret bir cevap bermediler: tapılır, qorqmañız, dediler. Er ana kibi, raat oturıp olamadım. Öz küçümiznen qıdırıp başladıq. Aqmescitteki Trubaçenko soqağında kiralağan dairege bardıq, onen beraber yaşağan oğlanlarnen laf ettik, o yürgen yollarda kezdik. Kameralar turğan yerlerni baqıp çıqtıq, adamlardan soraştırdıq. Soñki kere Eskenderni iş yerinden 500 metr uzaqlıqta yerleşken tükânda körgenini añladıq. Anda, sigaret almaq içün kirgen, amma Komsomolskaya soqağındaki işhanesine qadar yetip barmadı.
– Oğluñıznen yaşağan oğlanlar ne aytalar?
– Birisi işte edi, ekincisi Eskenderni körgen. O torbasına aş qoyıp, işke ketkenini ayttı.
– Eskender Aqmescitte çoqtan çalışamı?
– Yedi yıl devamında. Mında oqudı, eki yıldan berli şu işhanede furuncı olıp çalışa.
– Bu kibi şey olması mümkünliginen bağlı bir de bir alâmetler bar edimi?
– Yoq, iç bir şey.
– Oğluñız nenen meraqlana?
– Futbol oynay.
– Siyasiy areketlerde iştirak ettimi?
– Yoq.
– Belki de bir de bir tahminleriñiz bardır. Eskender bir kimsenen tanış olıp, ketmesi mümkünmi?
– Bunen bağlı tahminlerim yoq. O vaqtına kelip,işini tekmil becekre edi. Altıda işke kerekmi, demek altıda işte edi. Bu kibi şey iç bir vaqıt olmağan edi. Er daim Qurban bayramı künü telefon açıp, hayırlay edi, bu sefer telefon açar dep beklep oturdım. Eskender telefonnı coyğan vaqıtları bar edi, amma, başqasından bağlanıp, qayda olğanını haber ete edi.
– Qırımda yaşlar ğayıp olğanı sebebinden, oğluñızğa muqayt olmağa tevsiye ettiñizmi?
– Men er vaqıt muqayt olmasını rica ete edim. Er ana balasını kasevet eter, er türlü telüke aqqında tenbiyeler, tevsiyeler berir.
– Endi ne yapacaqsıñız?
– Biz kene Aqmescitke kelip, ariza bermek isteymiz. Bundan evel onı qabul etmediler, tapılır dep, üç kün beklemek kerek dediler.
– Kimge muracaat ettiñiz?
– Zair Smedlâyevge (Qurultaynıñ Merkeziy Saylav Komissiyasınıñ reberi – Müel. qaydl.). O ayttı: bağda bulunıp, er keske haber etmege tevsiye etti, Eskenderniñ resimini içtimaiy ağlarda yerleştirdi ve bu vaqia aqqında haber etti.
