Qırımtatar Milliy Meclis reisi Refat Çubarovnıñ zanınca, akimiyet oktâbr 6-da Kezlevde ölü tapılğan Edem Asanovnıñ ölümi zorbalıqsız olğanını bildirecektir.
Bu aqqında o Qırım.Aqiqat saytına bergen intervyüsında ayttı.
Onıñ aytqanına köre, gençniñ ölümi aqqında bir qaç malümat bar, amma onı aydınlatmazdan evel teşkermek kerek.
«Bizler olıp keçken facia aqqında er şey bilmeyik. Asılğan alda tapılğanı bellidir. Edem qorantanıñ tonğuçı edi, bir oğludır. Şimdi ana-babasınen olarnıñ 23 yaşında qızı qaldı. Bir qaç qaynaqtan alğan malümatlarım bar, amma olarnı aydınlatmazdan evel teşkermek kerek», – dep ayttı Çubarov.
Edem Asanov sentâbr 29-da ğayıp oldı. Bu künü kündüz onı Kezlev avtostantsiyasında körgen ediler.
Oğlannıñ qız qardaşı dey ki, Edem siyasetke kirişmedi, içtimaiy ağlarda bir de bir sert izaatlar qaldırmadı.
Oktâbr 6-da Edem Asanovnı Kezlevdeki baqımsız bir şifahanede ölü taptılar.
