Ukraina baş prokuraturası işğal etilgen Qırımda eki qırımtatarınıñ ğayıp oluvını ögrenip başladı.
Bunı onıñ matbuat hızmeti bildire.
«2014 senesi sentâbr 27-de 19 yaşında İslâm Cepparov ve 23 yaşında Cevdet İslâmov esir alındılar, olarnı mikroavtobusta belgisiz bir tarafqa alıp kettiler. Şimdi olarnıñ bulunuv yeri belli degil», – aytıla beyanatta.
Cinaiy iş Ukraina Cinaiy kodeksiniñ 146-ncı maddesiniñ 2-nci qısmına köre (eki ve ondan ziyade insanğa nisbeten yapılğan qanunsız esir aluv ya da azatlıqtan marum qaldıruv) açıldı. Maddege köre, cinayetçilerni beş yılğ qadar azatlıqtan marum qaldıra bileler.
Sentâbr 27-de Qarasuvbazar civarındaki Sarı-Su köyünde belgisiz şahıslar eki genç İslâm Cepparov ve Cevdet İslâmovnı esir aldılar. Olarnı alâ daa tapmadılar.
Sentâbr 29-da Kezlevde qırımtatarı Edem Asanov ğayıp oldı. Oktâbr 6-da onı ölü taptılar. Qırımtatar Milliy Meclisi Qırım.Aqiqatqa bergen malümatqa köre, oğlan asılğan alda tapıldı. Soy-sopları bu malümatnı tasdıqladılar.
Edem Asanovnıñ cenazesi salı künü, oktâbr 7-de, saat 15.00 Saq ş., Priozörnaya soq., 31 adresi boyunca olacaq.
