«Lokomotiv» sportkompleksinde erkekler arasında «Qurban küreşleri» milliy küreş boyunca VI Halqara yarış olıp keçti.
Yarışta farqlı küreş çeşitleriniñ vekilleri küreştiler: dzüdo, serbest ve yunan-roma küreşi.
Lâkin yarışta diger memleket vekilleri pek az edi, dep haber ete 15 minut saytı.
«Bulunğanlar arasında Qırım şeerlerinden er kes keldi, amma coğrafiyanıñ diger regionları – Türkiye, Moldova ve Ukrainadan – iç kimseni körmeyim. Yalıñız ayrı-ayrı temsilciler. Bunıñ sebebini añlatıp olamayım. Mence, bu Qırımğa kirmek qıyınlıqlarınen bağlı», – dep ayttı olimpik yedeginiñ aliy oquv yurtınıñ idmancısı Seif Çalbaş.
Sportçılarnıñ bir qısmını sıñırcılar Qırımğa kirsetmediler, dep bildirdiler yarış iştirakçileri.
«Men Türkiyeden eki küreşçini ve Moldovadan bir küreşçini kördim. Ukraina taqımlarını aytsaq – Kiyev gençlerini sıñırcılar Qırım yarışlarına yibermediler. Balalar alâ daa sıñırda bulunalar», – dep ayttı 100 kg ziyade kategoriyasında küreşken Temur Primşayev.
Er bir kategoriyada ğalip bahşışı qoy oldı. Yarışta 11 qoy berildi, ğaliplerden er biri qoynı boyunına alıp, haytarma oynadı.
Yarışta Qırımnıñ öz başına ilân etilgen baş naziri Sergey Aksönov da bulundı.
Bundan ğayrı, tedbirge Rusiyeniñ dzüdo boyunca nam qazanğan idmancı Aleksandr Krivorotov ve birinci olimpik çempionı – qırımtatarı Rustem Kazakov da keldiler.
