İşğal etilgen Qırımda daa bir genç qırımtatarı ğayıp oldı.
Bunı qırımtatar milliy areket iştirakçisi, qırımtatar halqı Qurultayınıñ Merkeziy saylav komissiya reberi Zair Smedlâyev Facebook saifesinde bildirdi.
«Yazıq ki, bayram künlerini de kergin haberlernen bozmağa isteyler. Er şey hayırlı bitmesini Allah bersin. Daa bir genç qırımtatarınıñ ğayıp olması aqqında haber keldi. Qurman rayonınıñ Kalinino köyünde yaşağan 1991 senesi doğma Apselâmov Eskender oktâbr 3-te aqşam Aqmescitte Trubaçenko soqağındaki kirasından işke yol aldı. İşke kelmedi, bağğa çıqmay, telefonı çalışmay. Eskenderniñ bulunuv yerini bilgenlerge ana-babasına bildirmege rica etile, onıñ anası Ayşeniñ telefon nomerası +7978 830 3510», – dep yazdı Smedlâyev.
Qırım.Aqiqat bildirgenleri kibi, işğal etilgen Qırımda adamlar sıq-sıq ğayıp olıp başladılar. Qarasuvbazar civarındaki Sarı-Su köyünde esir alınğan İslâm Cepparov ve Cevdet İslâmov alâ daa tapılmadılar.
