Qırım musulmanlarına cumhuriyet «baş naziri» Sergey Aksönovnıñ adından Qurban bayramı munasebeti ile 10 qoynı bağışladılar.
Qırım.Aqiqat mühbiriniñ malümatına köre, qoylarnı cumaertesi künü, oktâbr 4-de, Aqmescitte Seit Settar Camisinde bağışladılar. Şu munasebet ile camige «baş nazir muavini» Ruslan Balbek ve Qırım musulmanları müftisiniñ muavini Ayder İsmailov keldiler.
«Aksönovnıñ adından Qırım musulmanlarına bahşış etile», – dedi jurnalistlerge Balbek.
Onıñ sözlerine köre, cumhuriyet akimiyeti qırımlılar ile bağlı bütün medeniy tedbirlerde iştirak etmeli.
Ayder İsmailov Qurban bayram musulmanlarnıñ eñ müim bayramı olğanını qayd etti. Qurbanğa ketirilgen qoy eti Qırım musulman diniy idaresine berilecek.
