İşğal etilgen Qırımda yerli sağlıq saqlav «nazirliginde» kene de deñişmeler yüz berdi. Oktâbr 3-te Qırım sağlıq saqlav «naziriniñ» muavini vazifesine Svetlana Çernitsova tayin etildi, – dep haber ete Qırımnıñ öz başına ilân etilgen ükümet ruporı Krıminform saytı.
44 yaşında Çernitsova Qırım sağlıq saqlav nazirliginde 2009 senesinden berli çalışa. Soñki vazifesi – mahsus ve şifahane müessiseler bölüginiñ baş mütehassısı. Çernitsova Qırım «Devlet şurası» reisiniñ sağlıq saqlav meseleleri boyunca mesleatçısıdır.
Cumhuriyet sağlıq saqlav naziriniñ birinci muavini Ablâmit Ziyadinov sentâbr 1-de işten boşatılğan edi. Qırım akimiyetiniñ bildirgenine köre, onıñ qanun bozuvları ve ilâclarnı devlet satın aluvında nizamnı bozğan areketleri qayd etildi.
