Cumaaqşamı künü, oktâbr 4-te, musulmanlarnıñ Qurban bayramınıñ birinci künü, Aqmescitteki Beloye-6 qasabasında yañı cami açılacaq.
Bu aqqında Qırım musulmanları Diniy idaresiniñ matbuat hızmeti bildire.
Saat 8.30 camide bayram namazı qılınacaq, bundan soñra musulmanlarnıñ ibadet binasınıñ açılış tedbiri ötkerilecek.
«Cami 10 yıldan ziyade quruldı. Beloye-6 qasabasınıñ sakinleri sermiya toplap, binanı ardı-sora qurdılar ve bütün zarur olğan vesiqalarnı toplay ediler. Cami 150 insannı sığdıra bile», – dep bildire QMDİ.
Musulmanlar ileride minare qurmaq içün para toplanacağına ümüt besleyler.
Musulmanlarnıñ Qurban bayramı Qırımda raatlıq künü olaraq ilân etildi. Bundan sebep işğal etilgen yarımada sakinleri oktâbr 6-da raatlanacaqlar.
Ukraina musulmanları Diniy idaresiniñ din cemiyetleri Qırımdan ve Donbassta keçirilgen arbiy areketler yerlerinden köçip kelgen adamlarğa qurban etini tarqatmağa qarar berdiler.
Qurban bayramı – hac ibadetiniñ yekünlenmesini ifade etken islâm bayramıdır, onı Oraza bayramından 70 kün keçken soñ qayd eteler.
