Link açıqlığı

Geraşçenko: Yanukoviç, Pşonka ve Azarovnıñ qorantaları Rusiye vatandaşlığını aldılar


Viktor Yanukoviç ve Nikolay Azarov

Ukrainanıñ sabıq büyük memurları Viktor Yanukoviç, Nikolay Azarov ve Viktor Pşonka, em de olarnıñ aile azaları Rusiye vatandaşları oldılar, dep bildire Ukraina içki işler naziriniñ mesleatçısı Anton Geraşçenko, haber ete Azatlıq Radiosı.

«Yanukoviç, Pşonka, Azarovnıñ qorantaları Putin ile Rusiye vatandaşlığı aqqında añlaşıp oldılar, ve olar özüni şimdilik raat is ete bileler. İtibarlı qaynaqlarnıñ malümatına köre, Ukraina satqınlarına Rusiye prezidenti Putinniñ ayrı gizli buyruğına köre milliy havfsızlıq, mudafaa, nizam ve iqtisadiyat sistemasını bozuv boyunca sadıq hızmet içün mukâfat olaraq vatandaşlıq berildi», – dep yazdı Geraşçenko Facebook saifesinde.

Ukraina içki işler naziriniñ mesleatçısı şunı qayd etti ki, Rusiye anayasasına binaen, «Rusiye öz vatandaşlarını bir kimsege teslim etmey».

«Söz sırası, Ukraina da aynı», – dep qoştı o.

Bu arada Geraşçenko «satqınlarnı vatandaşlıqtan marum qaldıruv» boyunca Anayasa ve qanunlarnıñ deñiştirilmesiniñ tarafdarı olğanını qayd etti.

Rusiye Federal migratsion hızmeti Geraşçenko derc etken malümatnı izaatlama, dep haber ete RİA Novosti.

Sabıq prezident Viktor Yanukoviç, sabıq baş nazir Nikolay Azarov, sabıq baş prokuror Viktor Pşonka, sabıq içki işler naziri Vitaliy Zaharçenko ve diger memurlar fevral ayında Kiyevde kütleviy sürette adamlar öldürilgen soñ Ukrainadan qaçıp kettiler. Ukrainada olarğa qarşı cinaiy işler açıldı.

XS
SM
MD
LG