Cumaertesi künü, oktâbr 4-te, Ukrainanıñ musulman cemiyetleri musumanlarnıñ eki büyük bayramlarından biri olğan Qurban bayramını qayd etecekler.
Bu sene «Umma» Ukraina musulmanları Diniy idaresiniñ din cemiyetleri Qırımdan ve Donbassta keçirilgen arbiy areketler yerlerinden köçip kelgen adamlarğa qurban etini tarqatmağa qarar berdiler.
Bunı «Umma» UMDİ matbuat hızmeti bildire.
Cumaertesi künü saat 8:30 bayram namazı qılınacaq. Onı «Umma» UMDİ müftisi Said İsmagilov Kiyev İslâm medeniyet merkeziniñ camisinde keçirecek. Ondan soñra balalar ve büyükler içün kontsert ötkerilecek.
Matbuat hızmetiniñ malümatına köre, bayram tedbirlerinden soñ ve bayramnıñ ekinci künü qurbanlar çalınacaq. İmkânı olğan er bir musulman adamı qurban çalmaq kerek.
«Bu sene «Umma» UMDİ din cemiyetleri qurban etini Qırım ve ATO yerlerinden köçip kelgen adamlarğa bermege qarar aldılar. Paytahtnıñ (Kiyevniñ – muarrir) yardımğa muhtac musulmanları ve köçip kelgenler bazar künü, oktâbr 5-te, etni alacaqlar», – dep bildire UMDİ.
Buğa, qoy ve tekeler qurban ayvanları sayıla. Bayram namazından soñ, ya da bayramdan soñ eki kün içinde qurban çalına. İmkânı olğan er bir musulman qurban çalıp, yardımğa muhtac olğan adamlar ve musafirlerinen paylaşmalı.
Qurban etini üç parçağa böleler: birincisini özüne qaldıralar, ekincisini musulmanlarğa hayriye olaraq bereler, üçüncisini ise – soy-soplarğa bereler.
Musulmanlarnıñ Qurban bayramı Qırımda raatlıq künü olaraq ilân etildi. Bundan sebep işğal etilgen yarımada sakinleri oktâbr 6-da raatlanacaqlar.
Qurban bayramı – hac ibadetiniñ yekünlenmesini ifade etken islâm bayramıdır, onı Oraza bayramından 70 kün keçken soñ qayd eteler.
