Rusiye teftişçileri Canköy kiriş noqtasında işğal etilgen Qırımğa taze buzlatılğan balıqnı kirsetmege izin bermediler.
Rosselhoznadzor añlatqanı kibi, 17 tonn balıq Kiyev vilâyetinde Sçastlivoye köyünde yerleşken OOO «SP UVRK»dan Aqmescit iş adamına yollanılğan eken.
«Yükniñ vesiqalı nezareti vaqtında Ukrainadan qırımlılarğa AQŞ, İspaniya, İskoçiya istisalcılarınıñ mahsulatı yollanılğanı belli oldı. Bu ise Rusiye Federatsiyasınıñ Prezidentiniñ 06.08.2014 senesi çıqarğan №560 «Rusiye Federatsiyasınıñ telükesizligini temin etmek maqsat ile ayrı iqtisadiy qararlarnıñ kirsetilüvi aqqında» qanunına ters kele eken», – denile beyanatta.
Mında şunı da bildirdiler ki, Qırımğa Poltava vilâyetinde çalışqan şahsiy şirketniñ bir tonna balığını da kirsetmege imkân bermegenler eken.
